Terugkijkend op de uitvaart van Gerrit Ermans

RedactieLeden

We kijken samen met de familie terug op een zeer mooie uitvaart voor Gerrit Ermans. Het was een bijzondere dienst in de kantine van Sportclub Susteren om afscheid te nemen van de beste heer. Ruim 400 mensen waren ter plekke en 70 personen hebben de dienst gevolgd via de livestream. Tijdens de dienst stonden er collectebussen die ten goede kwam voor de jeugdafdeling van SCS. Net voor Kerst heeft de familie dit aan het bestuur gegeven en is een prachtig bedrag van € 2000,- opgehaald. We gaan zorgen dat dit geld een mooie bestemming krijgt. Hieronder lees je speech die voorzitter Kevin Hoffmans gaf tijdens de dienst.

Bèste luuj, leef familie,

Welkom in de grotste tuin van Limburg. Zoa omsjreef Gerrit zien sjportpark in un filmpke ruum 15 jaor geleeje. ‘Ut is väöl werk zonne tuin, ich mot ut thoes door angere laote doon’. Welkom in ut domein van Gerrit Ermans, wo volges Anna & Sophie ‘Opa de baas is’.

Vandaag zeen w’r hiej samen mit familie, vrunj, ambassadeurs, leeje van de voetbalclub en luuj oet de gemeinsjap om Gerrit de lètste ieër te bewiezen. W’r sjtaon hiej (en mit w’r sjpraek ich names de ganse voetbalclub) mit un brok in os kael. Want ut duit pien om aafsjied te numme van eemus dae ontzettend väöl haef gedaon veur os club. Os greun-wit hart huilt, mer os greun-wit hart sjtraolt auch. Van trots.  

Aangezeen neet ederein hiej Gerrit al die jaore haef gekènd en wèt wat de relasie is gewaes tösje voetbalclub en heumzelf, gaon w’r ieës trök nao un periode wie de Selfkantj nog un Limburgse previncie woor. In de jaore ’50 wool Gerrit gaer voetballe. Hae goaijde zien sjoon door de roet en klom d’rachteraan om sjtiekem nao ut sjportpark te gaon. Es ziene pap d’rachterkoom zjweijde d’r get. Want pas op 15-jaorige laeftied in 1959 moch hae van zien auwersj eindelijk lid waere. Pap woort daonao ziene vaste supporter.

Op 18-jaorige laeftied sjpeelde hae in ut ieëste er verzörgde trainingen aan de jeug. Ut zeen de ieëste vriejwilligersoere die hae haef gesjreve. Jaorelangk is hae vervolges hoofdjeugdopleider gewaes en vanaaf 1964 woort der lid van de jeugdcommissie en ut besjtuur. Dit combineerde hae mit ut sjpele in ut ieëste en ut drage van de aanveurdersbandj. In 1970 woort Gerrit op 31-jaorige laeftied hoofdtrainer van ut ieëste. Hae trainde trouwes auch de res van de senioreteams derbiej, want ‘ut is ech neet zoa det sjpelers van ut viefde de versjlete bel en aafgedankte shirts van ut ieëste kriege’. Alle take deeg hae belangeloos, oet un zuuver idealisme. Allein de trainersopleidinge woorte door de club betaald. ‘Es ze mich auch mer eine cent gaeve, bön ich eweg’, leut d’r opteikene in ut Limburgs Dagblaad in 1975. Det is ut ieëste moment det d’r wurd gesjreve euver Mister Sportclub Susteren. 55 jaor geleeje.

Successe woorte auch gevierd. In ut sezoen 77-78 promoveerde hae mit de groep nao de ieëste klasse. In 1980 stjopt hae nao 10 sezoene es trainer, om es leider biej ut 2de wiejer te gaon, mer in 1984 sjtuit Gerrit weer veur de groep es ze in de 3de klasse voetballe. ‘Ich kin van gelök sjpraeke det Tilly en mien 2 dochters voetbalminded zeen. Es weer un dameselftal zoewe höbbe, den deege die twieë mit. Noe handballe ze’. Wie ich ut loos veulde ich geweun de teleursjtèlling det zie neet zien favoriete sjport zeen gaon beoefene. Hae zei nog net neet ‘helaas’ d’rachter. Mer Edit en Chantalle, weer höbbe noe un keigezellig damesteam en vriejdig sjpele ze thoes. Dus geer kint uch nog bedènke. In det jaor is Gerrit benump es allerieëste ieërelid van de club.   

De sjpanning van wedstrijden koos hae sjteeds sjlechter höbbe. Tiedes zien trainerscarrière lasjde hae ‘dieetdaag’ in op zaoterdige en ging hae wanjele op zunjigochtend. Vanaaf det moment is d’r neet mieë actief gaon kieke nao wedstrijde. Aangezeen d’r neet mieë op ut veldj wool sjtoan, ging der zich mer bezig hauwte mit ut veldj. En det höbbe väöl luuj geweite. Want veur väöle hiej in de kantine en boete, is ut begoos mit un paar voetbalsjoon die Gerrit nog hauw sjtaon. Hae woor ut werme welkom van os allerkleinste leeje die veur ut ieës ut veldj op ginge. En det vonj d’r auch ut sjonste. “Es se op maonjig- of woonsigaovend de jeugd bezig zuus en hiej unne mierenhaup rondjlöp, det is schitterend”, zei d’r. Hae zal trots zeen gewaes det bekans alle kleinkènjer auch dao zeen begonne. Op 55-jaorige laeftied kreeg hae door de eerste burger van Susteren de zilveren eremedaille, verbonje aan de Orde van Oranje-Nassau opgesjpeld. Un teike det w’r noe kènne es lintje en un bliek van waardering, auch boete de club. Auch de KNVB zoog wat Gerrit haef beteikend veur ut voetbal in de regio en biej de club en haef Gerrit geëerd mit de gouden speld.     

Mergood, Gerrit hauw zich dus ontfermd euver de accommodatie en ut ongerhoud. En aangezeen hae op vreuge laeftied koos sjtoppe mit zien werk veur Campina, ging dae tied nao de voetbalclub. Elken daag bezig zeen mit ut ongerhoud, sjnel get aete thoes en ’s aoves truuk om ut sjportpark te äöpene. En hae woor zuunig op sjpulle! Volges mich moch ich pas op mien 20ste zelfsjtènjig de bel pompe en neemus moos ut wage om mit 9 bel in ut net truuk te komme. Zelf kleidkamers potse en truitjes wesje? Haol ut dich neet in de kop om det te doon, det hoort geweun biej zien wirk.  

En neemus moch ‘m det werk auch aafnumme. Zelfs es luuj kome helpe zoawie Frenske, Peter, Frits, Jos of John. De groate take wore veur Gerrit. Mot zègge det d’r aaf en toe waal get eigewies woor hiej-in. En es der heij aafgesjpraoke om om 9 oer smörges get te doon, den woort d’r zelf al om hauf 8 dao om veurwerk te doon. Es besjtuur woole w’r ‘m auch besjerme en langzaamaan minder laote komme. Mer w’r krege ‘m neet euvertuug, auch neet es John, Wilbert of ich mit ‘m kalde. Ut seert de clubman dae zien dènger wilt blieve doon.     

Pas in coronatied moos hae unne sjtap truukdoon. En toen merkte w’r pas ech wat d’r allemaol biej kump kieke esse unne ganse aovend of ganse weekenddaag dao zits. Soms is det geweun saai en gebeurt d’r niks. Mer Gerrit vonj det sjoan. Aaf en toe aan de trap sjtoan kieke, zien gezèt nog uns van veur tot achter laeze, unne bal repareren, de tv of de radio aan en es ut röstig is baove in de kantien biej Lilian un pilske drènke.

Wie de vreselijke ziekte in zien laeve koom, kreeg d’r ut moeilijk. Geistelijk nog ontzettend sjerp, mer ut lichaam sputterde taege. Aan ut balen woor d’r det d’r neet op ut 90-jaorig jubileumfieës koos zeen om zien 70-jaorig lidmaatsjap mit Matje en Michel op ut podium te vieren. Mer ut applaus det d’r toen kreeg, zal d’r höbbe geheuërd tot in Ech. Sjoan woor ut den auch det w’r häöm oppe nuujjaorsresepsie begin dit jaor esnog ut beeldje kooste euverhandige.

Hae bleef mood hauwte, koos deze zomer nog effe mit mit ut lienetrekkersuitje en leet zich op gooj daag zeen oppe club of biej Alois. Auch heij der zich nog mit Toos opgegaeve veur de Mosjel- en Goulashaovend begin deze maondj. De gezondjheid leet ut echter neet toe en dus ging ut kaetelke Mosjele nao Ech. Zelf oot der ze neet mieë, mer Toos, heij ut good gesjmaakt? Väöl sjteun kreeg d’r van al ut bezeuk biej hun thoes en op ut lèts in ut Hospice. Oeteindelijk haef d’r dao op 86-jaore laeftied mit de kènjer aan zien zie ziene lètste aojem oetgeblaoze.            

Ich sjloet aaf mit un klein alfabet:

  • Allerieës de D van Dasburg. De plaats wo hae de ganse zomersjtop te vènje woor en zich op koos laaje veur ut nuuje sezoen. De plaats wo complete teams sjpek mit ei ginge aete die Tilly heij klaorgemaak. De plek wo menig kuemerling en pilskes zeen laeggedronke biej Paul en de plek wo de caravan elke daag unne maeter nao lènks of rechs woort versjaove. Want vies kalle aan ut buffet, koos d’r hieël good.
  • Den drie kieër un T
    • Allerieës de T van Tilly. De vrouw die achter ‘m sjting en zien sjteun en toeverlaot woor. Groat woor ut verlees 15 jaor geleeje wie zie sjtorf. Baove in de hemel zeen ze noe weer herenigd.
    • Ich num auch de T van Toos. Want wie sjiek woor ut det die twieë zich hiej in de kantine höbbe getroffen. Ut gelök en ut plezeer sjtraolde van uch aaf en fijn det geer nog zoa langk same höb belaef. Ich höb ut zelf jaorelangk geprobeerd, mer ich dach det det neet koos.
    • En de litste T is van ut sjtök chocola wasse krigse esse unne gooje boer leets. Wit eemus wo ich ut euver höb? Hae zei waal ummer desse den unne Twix kreegs, mer ich höb ‘m zelde eine zeen oetdeile. Biej deze.
  • En den nog de V van Vastelaovend
    • Zeer nauw betrokke biej de vastelaovesgezèt en in 1963 en jaorelangk es vriejwilliger betrokken biej d’n optoch van de Graasbörgers. Omdet den toch gein voetballe woor, ontermde hae zich euver ut good laote laupe van d’n optoch.
    • En vastelaovend viere koos d’r zelf auch. Op de vriejdigaovend leet hae zich es ein van de ieëste zeen, geheel verkleid mit un simpele sjaal of petsjke en zonne road-gael-greune trui oet de jaore 90. Veur heum un sjoan moment wo al zien kènjer en kleinkènjer (van voetbal- en handbalclub) biej elkaar komen.
       

W’r sjtoan hiej mit traone in os uich, mer mit un gigantisch trots geveul. Doe zuls veur os altied ‘Mister Sportclub Zöstere’ blieve.

Gerrit, bedankt veur alles.